絲絲講場：鍾少權遊俄國唔怕孤寒
近排天氣忽冷忽熱，不過絲絲仲係好難忘今年農曆新年最凍嗰幾日，真係凍到震騰騰！
原來有人似乎愈凍愈覺得好玩，星展香港董事總經理兼豐盛理財及分行網絡業務主管鍾少權（Derek）話，今年一月新年時去咗莫斯科同聖彼得堡，得零下26至30度，成條街都無乜人，好好行。
一個人孭背囊四圍走
其實Derek一向都幾好動，佢話今次仲係一個人揹住背囊去旅行，十足十年輕小伙子好興嘅backpacker咁，亦無book酒店，揀咗住旅舍（hostel），而且喺咁凍嘅天氣，仲徒步去各個景點。佢話喺莫斯科搭地鐵居多；但係喺聖彼得堡時，就只搭咗一程地鐵，其他景點都係安步當車行過去。
零下幾十度行街仲好
零下幾十度仲要做背包客，絲絲認為Derek似冒險多過去旅行，但係佢就話條街好好行，點解？因為太凍無乜人出街逼吖嘛！
鍾意影相嘅Derek亦唔怕辛苦，揹埋部單鏡反光機去影相，點知一拎部相機出嚟，部機就凍到「蕉」咗，惟有除手套用iPhone影，佢話嗰下凍到入骨，真係記憶猶新。
余詩韻