市場熱線：盈德跟大戶走一轉
恒指靠祖國移動（00941）貢獻65點單天保至尊，尋日得以保持3連升，但國指仍要跌30點，成交奀到得544億元。恒指尋日下晝跌到最低位，但之後一路挾升超過200點，到臨尾幾分鐘更轉跌為升。瑞信加入祖國移動「大合唱」行列，目標價仲升到101蚊，原因亦係睇好4G前景，但4G唔係最近先發展，而且到後年至商業營運。
尋日連埋美股期指，只得香港同新加坡魚缸可以微升（歐洲早段先跌後升），大家驚住聯儲局今晚議息，因為每次伯南克唔提QE3都會跌市，而花旗國呢排數據咁好，令到QE3冇乜藉口。不過，上個禮拜傳出有個「改良版」QE，總之短期市況要睇伯南克係出口術抑或烏鴉口。
炒賣氣氛仍良好
祖國移動升3.86%未算勁，和黃（00013）三點四開始變甩繩馬騮狂升3蚊，唔通又炒定4G效應？總之呢排時興輪流炒，個市應該未見頂，尋日有23隻股票創52周新高係另類指標。
日本呢頭紀念「三一一」，各地唔少反核示威，祖國揀呢個時候公布今年復審批核電，唔知攞景定贈興。尋日核電股集體爆發，其實呢個消息大家已預咗，日本舊年停用核電之後，貿赤同經常帳赤字都爆燈，中國二月貿赤亦創十年新高，又驚打仗又驚伊朗封鎖海峽，所以搞核電目的係確保經濟安全。
除咗核電股之外，兩隻電視機股公布二月銷量之後亦走勢靚仔，唔單止銷量冇受以舊換新政策結束影響，愈來愈多人買LED電視同3D電視，可以帶動埋毛利率，創維（00751）同TCL多媒體（01070）今年依然有錢途。不過，鐵路股又出軌，高鐵河北段因大雨倒塌，難免再影響同胞對高鐵嘅信心。古勝尋日啱啱推介中國南車（01766），但意外唔關車組事，只係對中鐵（00390）同中鐵建（01186）影響較大，所以不妨趁呢個機會低吸南車。
供氣量持續增長
呢排升市有唔少股東或大孖沙趁高減持，最得人驚係理文造紙（02314）大股東不斷喺場內沽貨，盈德氣體（02168）今年亦先後有兩個主要股東減磅，但股價短暫下跌之後又反覆創新高。唔同嘅係，批股接貨嘅唔係普羅散戶，即係大戶轉手畀大戶。
盈德喺禮拜五就派成績表，近期走勢咁好，斷估可以攞高分，舊年上半年已經賺多51%，公司增長主要靠增加供氣量，截至舊年中有23個項目正在興建，未來增長有一定保證，里昂年初引述管理層話一二年盈利增長20%料可以達標。
公司主要做工業氣體，出口下滑可能會影響工業需求，但二月進口原材料數量上升，預示環境可能有改善。盈德貨源其實幾分散，大股東持貨唔多，但由舊年尾開始幾次批完股都有「不死身」，證明貨源冇流到出街，可以搭一轉大戶順風車。
古勝