有玩電子結他嘅朋友一定識得「Fender」，仲可能彈過佢哋出品嘅結他添。絲絲尋日就八到，大家唔止可以彈佢嘅結他，仲可以買埋佢隻股票喎！
Fender已經正式申請喺納斯達克上市，諗住集資2億美元。佢哋話上市將為製作、聆聽同表演音樂嘅方式，帶嚟革命性嘅改變。但上市文件亦披露，佢哋○七年收購另一間結他廠Kaman Music嗰時爭落一大筆錢，依家負債總額高達2.4億美元，所以集資嘅錢要拎成1億美元去還債。
Fender喺四六年創立之後，成為唔少殿堂級結他手嘅最愛，好似Jimi Hendrix、Eric Clapton、Pink Floyd主腦David Gilmour，甚至近代嘅Simple Plan都用佢嘅結他，或者做過佢嘅代言人。
不過，如果班結他手變心咁點算？公司都承認，如果班音樂明星唔再用佢哋嘅產品，公司嘅業績就會受到影響嘞。睇嚟，買佢哋股票嘅投資者，最好要熟悉吓音樂潮流先得喎！