中證監主席郭樹清（圖）上任四個幾月，破舊立新嘅處事作風令人刮目相看，多番談股論市更令股民睇到入神。佢咬牙切齒力挺A股、分析員上身嘅形象，已經迷倒唔少股民，難怪佢繼續擔起為民請命嘅大旗，向股民落力推介藍籌優質股啦。
郭主席貴為新一代股市守護者，唔單止大刀闊斧提出改革，包括「IPO不審行不行」、嚴打證券違規、創業板退市制度等，亦不時「發揮」背景優勢，公開高喊「滬深藍籌股靜態市盈率不足十三倍，顯示出罕見投資價值」。
最近佢仲大方分享嘅三大基本投資邏輯，分別就係目標要鎖定績優大盤股；唔好將雞蛋放喺一個籃子裏面；市盈率倒數就係投資回報率，所以40倍或50倍市盈率嘅股票，除非有好似微軟或者蘋果公司一樣嘅前景，絕大多數都會成為「有毒的金融資產」。
郭主席嘅硬銷言論，已廣泛流傳喺股市之中，雖然「我國股市估值長期偏高，現已降到歷史最低，可長期投資」嘅高見言猶在耳，不過，為免激怒更多經濟學家嫌佢「撈過界」，佢亦慎重澄清「我不是股評家，沒有對任何個別股票做過評論」。