有人話證券界吹緊淡風，實力比較弱嘅證券行唔係減緊分行數目，就係索性宣布結業。不過，「逆市」總有奇葩嘅，就好似信誠證券咁，啱啱就有新分行喺紅磡蕪湖街開幕，但總行連分行數目就喺「一加一減」下維持原先嘅七間，變相全部都係自置物業。
點解會咁樣？原來該行一直喺紅磡蕪湖街有間分行，但原來只係租番嚟，啱啱租約完咗，就喬遷到對面嘅自置物業，同其他信誠分行一樣，以後都唔使捱貴租，盈利隨時更上一層樓啊。
相對某些同業分行由一間到二十間不等，七間可能屬「中庸之道」，咁信誠今年會唔會繼續開分行呢？信誠劉老闆（信誠證券董事總經理劉昇昂）話，交易時間延長、期指夜市等，都令佢哋要增加人手，但就會一步步嚟，開分行都係要循序漸進，好似投資咁唔好太過急進。咁又係，要做到100%分行都係自置物業，喺地少人多嘅香港真係唔容易o架！