最近世銀公布嘅報告，唔單止引起內地極大爭論，仲挑起埋「國進民退」嘅怨懟，猛話國企霸住市場，民企好難搵食。
曾經擔任國企「大管家」長達七年嘅李榮融，就將國企比喻為「高比拜仁」，反問：「如果冇咗高比，乜仲係湖人隊咩？」
李榮融對「國進民退」嘅講法斥為「無稽之談」，仲羅列咗大堆數字，證明國有工業企業嘅市佔率正喺度下降緊，由九八年到一○年，國企數量嘅比重，已經由39%跌到落去4.5%；從業人數亦由60.5%縮減19.2%。佢又話，咁多年「民進」嘅步伐比「國退」快，由○六年開始，民企佔據嘅資產總額已攞咗半壁江山，成為市場主力。
不過，佢承認上面嘅數字，唔包括國有非工業企業同埋金融企業。咁國企同民企協調發展嘅關係又點算？李榮融於是將國企比喻作高比拜仁。「湖人隊可以冇高比咩？淨係靠其他人，仲可以係湖人隊咩？」各位民企老闆，你哋就爭氣啲化身做林書豪喇，高比都可能會輸畀你o架！