絲絲講場：甘慶林《牛頓定律》解構匯賢業績

涉盈利預測一概唔答

絲絲係文科出身，唔係好識得物理學，對於牛頓嘅認識，僅限於牛頓定律。話說匯賢舊年至上市，大家都好想知嚟緊公司有冇購併、借貸、增發基金單位嘅進展。佢都覺得可能會涉及對未來盈利有預測而唔答，叫大家返番去睇上年嘅業績情況。

話晒係上市公司，預測嘅嘢唔可以亂噏，甘生嘅答法都非常合情合理。

溢利增長料有慣性

甘生唔知係咪怕大家唔諒解佢嘅難處，忽然拉埋牛頓第一定律（Newton's First Law of Motion）出嚟：「動者恒動，靜者恒靜，如果冇外力干預，呢個慣性係唔會停止。喺○二至一○年，東方廣場（匯賢嘅主要物業）經營溢利年複合增長率達到17.2%，相信呢個慣性會繼續落去。」

絲絲聽完之後，完全覺得係返番去中學時代，上番一堂物理堂囉。話時話，甘慶林係讀工程出身嘅，一九六九年港大畢業獲得工程學士學位，唔怪得物理定律背得滾瓜爛熟。唔知今日佢會唔會講相對論呢？睇黎絲絲再見佢之前，真係要補習下先得嘞。