市場熱線：中石油買定做貨底
港股三連跌，係接近三個月來升浪嘅第一次，之前破完一個頂又一個頂，呢3日就穿完一個底又一個底，尋日穿咗保力加通道底部，又再殺多30隻恒指牛。不過，尋日走勢又唔算好差，全日最低位開出之後收番支陽燭，皆因美股期指率先反彈，亞洲魚缸跌幅亦差唔多，A股一樣係連跌3日。
又輪到防守股得寵
今次嘅藉口係希臘同班債主未必喺今日限期前傾掂數，有份機密檔案仲話一旦違約，全歐洲會唔見1萬億歐元，真係嚇死人唔使本。金魚缸就係咁怪，氣氛好時任何壞消息都視而不見，氣氛差時則將壞消息無限放大。照計希臘三關已過咗兩關，冇理由畀佢臨尾香，所以唔少股民諗住撈底博反彈。
新華富時指數宣布更換組合，班新貴尋日最威。國壽（02628）大跌6%，但A股僅跌1%，保險股要睇投資收益存在好大變數，祖國唔少有心人出力推動養老金同理財產品入市，但魚缸風高浪急，輸咗責任邊個孭？旺旺（00151）派完成績表後飆升7%，平咗歷史新高兼創收市新高，其餘一眾防守股亦風水輪流轉，維達（03331）亦創新高，恒安（01044）、粵投（00270）同中食（00506）都表現唔錯。
汽車代理股終極反彈，舊年大賣嘅貴價車開始漏氣，耀萊（00970）連續大跌4日之後，尋日先跌後倒升，其餘中升（00881）同正通（01728）均反彈4%，幾隻車股好似長汽（02333）、比亞迪（01211）等亦逆市呈強。祖國今年頭兩個月合計汽車銷量出現倒退，係7年來最差，連貴價車亦滯銷，瑞信話耀萊好難達標，所以車股同代理股今年要留心銷售數據。
講起瑞信，啱啱將恒指目標價調高到24,000點就即刻見頂，你話邪唔邪？所以相反理論幾時都搵到食，問題係時機掌握得好唔好。
中國放棄保八，巴西舊年GDP令人失望，全球又開始驚經濟疲弱，金價即時跌穿千七，油價亦回軟到105美元（亞洲時段），油魔驚經濟衰退多過驚打仗，但對於中石油（00857）同中石化（00386）來講，寧願油價回軟，對公司煉油業務會有利。
今年隨時再有驚喜
中石油管理層話，舊年煉油虧損會高過原本預期嘅500億人仔；公司舊年頭三季僅賺多3.4%，全年成績表亦唔慌有乜增長，一一年PE維持11倍幾，但古勝認為可以乘機收集望今年會有驚喜。
中石油介乎中海油（00883）同中石化之間，油價高有利採油業務但不利煉油業務，舊年尾阿爺提高暴利稅起徵點，另外會推進天然氣價格改革同國際接軌，今年兩份「禮物」會反映喺業績度。至於煉油業務被一致睇淡，惟有寄望個成品油價格改革機制盡快落實，通常噏得兩、三年就會成事，所以今年之內隨時收到第3份「禮物」，依家可以先行收貨。