尋日台灣股市好熱鬧，因為以賣牛扒起家嘅王品集團終於上市嘞，收市價勁升45%，投資者真係賺到笑。公司董事長戴勝益係行銷高手，次次出場都會製造話題。今次佢唔着老西、坐名車去交易所，而係帶埋班着晒紅衫嘅主管，浩浩蕩蕩踩單車到現場，夠晒環保同健康呀！
戴勝益係個好鍾意做運動、創意十足嘅老闆。公司做上市推介時就特登揀喺孔廟舉行，佢話「係孔子教我半部論語而創造王品」嘅。佢引用論語所言，「願車、馬、衣、裘與朋友共，敝之而無憾」，所以佢送畀交易所嘅上市禮物，就係一部《論語》嘞。
王品係台灣名牌餐廳，曾經畀打工仔選為「最想加入嘅幸福企業」，市場認受性非常高。佢哋一話要上市，就湧入超過1,400億（新台幣‧下同）資金爭崩頭，超額認購高達810倍，咪話唔犀利。
王品IPO價係340元，一開市即見495元，最後收市大升45%。幸運中籤嘅散戶，每手1,000股賺超過15萬元，先兩年有內部認購機會嘅員工，最多可以賺45萬。王品今年目標係喺兩岸開夠315間店，仲可能開到嚟香港添，遲啲大家可以去試下o架。