絲絲講場：張樹槐傳遞「跑馬」精神
自問懶骨頭唔願郁嘅絲絲，一見到熱忱運動嘅人，就特別欣賞，講緊嘅係恒生銀行傳訊及企業責任總監張樹槐（Walter），佢呢十年跑咗32項馬拉松，更希望將馬拉松精神，傳畀「九十後」年輕人。
佢早前抽時間接受《少年警訊》啲小記者訪問，坦言細個嗰陣唔係運動健將，人到四十先開始接觸長跑，點知獻出第一次，跑完一次10公里賽事後，就對呢種運動一見鍾情，舊年佢仲畀咗個海拔12,000呎嘅挑戰自己：喜馬拉雅山160公里超級長跑，最後用咗5日5夜完成個人創舉，絲絲真係要頒個「最仰慕人物大獎」畀佢！
10年跑32項馬拉松
點樣將馬拉松精神運用到日常生活裏面？Walter話，佢嘅座右銘係「將勤補拙」，原來係佢以前做記者嗰陣，佢上司嘅一句「Don't take no for an answer」啟發咗佢。佢由一個外表文質彬彬嘅人，喺短短10年內跑咗32項馬拉松，喺五大洲留下腳毛，總路程仲有成1,500公里咁長！睇到咁激勵人心嘅故事，絲絲突然有一股衝勁，等我依家都去跑番兩圈先！