尋日首度登場嘅彭博社富豪指數，公布全球20大富豪排名，facebook（fb）舵手朱克伯格未能上榜，彭博社就特別為此解畫，解釋點解佢身家估計達284億美元，居然會輸畀身家約224億美元，排第20位嘅法國女富豪、歐萊雅繼承人貝當古夫人。
fb嘅上市文件話朱克伯格行使認股權後，會持有約28.4%股權，以fb高達1,000億美元嘅上市估值計算，佢身家應該令佢成為全球第11大富豪。不過，fb招股書未將以行使認股權及受限制股票形式發行嘅股票，計算喺總股本之中，加上扣除埋佢行使認股權而要交嘅稅後，計計埋埋佢嘅持股會攤薄到21%左右，身家只有約210億美元，仲未夠班打入全球富豪榜二十大。
呢個新榜，由墨西哥電訊大亨斯利姆（Carlos Slim）先拔頭籌，以685億美元身家榮登全球首富寶座，力壓美國富豪代表蓋茨及「股神」巴菲特，同《福布斯》喺舊年公布嘅全球富豪三甲排名一模一樣。
新登場嘅彭博社富豪指數當然要有新猷啦！佢嘅賣點係會動態追蹤富豪身家變動，根據股價升跌喺每個交易日更新，好似首富斯利姆咁，佢嘅身家就係上星期五單日縮水4.7億美元，波動都咪話唔誇張。
印度富商穆凱什安巴尼（Mukesh Ambani）保住全球富豪榜第11位，並以268億美元身家成為亞洲首富，而大中華地區首富李嘉誠身家有258億美元，以10億美元之差居亞洲第二。