香港有七百幾萬人口，比例「女多男少」，已經係毋庸爭辯。根據人口普查，每一千個女士，只有876個男士，因為咁，連女廁數目都話要興建多啲，反映社會需要。但絲絲估唔到嘅係，連傳統係「男士天下」嘅會計行業，依家報讀會計嘅學生人數都係女生多過男生，仲要係多成十二個百分點，都咪話唔引起大家關注！
會計師公會近期就做咗個該會學生嘅統計調查，發現截至舊年八月底，學生嘅男女比例，同香港人口比例「不約而同」，喺15,630名學生（包括畢業生）中，有8,777名係女生，佔整體比例56%，但就只有6,853名男生，只佔44%，即係話女生人數足足較男生跑出12個百分點。
會計師向來喺專業界別擔當好重要角色，絲絲好想知道，其他金融界別，好似投行、經紀等界別嘅男女比例，會唔會都係同香港人口比例愈嚟愈相似呢？