市場熱線：中自化絕地反擊
港股繼續一日升、一日跌，最近古勝已叫大家唔好炒市，陰陽怪氣唔知想點。尋日恒指跌近3舊，唔止10日線，連兩個幾月未穿過嘅20日線都穿埋，國指更加大跌2.28%。歐洲又有啲壞消息，例如鬥牛國今年削赤未達標，希臘同班債主未傾掂數，啤酒國未必可以通過歐洲財政聯盟條約等。不過，對個市更大心理影響係港匯回軟到7.76，好多股民視港匯係指標（雖然係滯後指標），第二輪長期再融資操作（LTRO）筆新水未必眷顧香港。
加時第一日成交得579億元，多半粒鐘交易但成交不升反跌，而且大家好似對跌市冇乜感覺。祖國方面，孖屐只係炒吓個別概念股，A股亦先升後跌，溫總講GDP目標7.5%、通脹控制喺4%、出入口總額增長目標10%，但明知都係保守估計，所以亦唔會太認真。
紅色保險股受狙擊
不過，農業股、環保股同消費股呢類主題股仍有得炒，其實年年開會都係嗰幾味，消費股如百麗（01880）、利邦（00891）、匹克（01968）等都表現唔錯。不過，「博士田雞」（01698）同高鑫（06808）就例外，前者有瑞銀目標價由6.03元大幅下調到3.6元，但距離現價仲有33%上升空間。至於高鑫成績表明明好過招股預測，但其實低過市場預期，皆因招股預測通常已預留水位。
AIG前排仲放聲氣可能掉轉頭增持友邦（01299），但見派完成績表後升到接近30蚊，一個屈尾十批股減持。尋日無論AH都係保險股跌得最甘，沽空亦相當勁，被空軍狙擊原因可能係睇死滬綜指冇力升破2,500點。
尋日最顯眼係電池股，舊年阿爺整頓唔合規格嘅鉛酸電池企業，超威（00951）成績表相當靚仔，其他兩隻亦唔會差，今年會繼續淘汰劣質鉛酸電池，傳聞電動自行車新國標會喺年尾出台，長遠計鋰電池亦會取代鉛酸電池，但呢類股仍起碼玩多半年。
安全系統危中有機
一度停工嘅14條高鐵喺今個月已局部復工，但鐵路股近日升得多後有回吐，最落後嗰隻係中國自動化（00569），公司已發出盈警，但冇話賺少幾多，既然鐵路停工，相關合同延誤亦係預咗，只要今年業務回復正常，反而係趁低吸納嘅好時機。
去年溫州事故係煞車系統有故障，中自化係做安全及緊急控制系統，業務更係最為敏感。發生意外之外，阿爺勢必更注重安全警報系統，行業可能要大執位，所以危中亦有機。
集團除鐵路之外，另一主要業務係煤化工安全系統，阿爺年年都話要限制煤化工產能，但實情係高油價肯定利好煤化工行業（作為石化替代品），中自化亦會受惠。隻股尋日一支大棍逆市上升，月尾份成績表已打定輸數，但今年相信有個新開始，由高位累積跌幅已6成，上番跌幅一半已可見4.34元，唔咁貪心博反彈0.318亦可以見3.38元。