喺電影蜘蛛俠裏面有句名言，就係「能力愈大，責任愈大」，即係話能者多勞喇！但如果要同一時間做16個職務，你估蜘蛛俠仲有冇精力同能力做埋第17個呢？
近日內地有位巾幗英雄王曉濱，佢有20年國際資本市場投資、融資經驗，仲做過投資銀行添。京城著名學府請佢講學，中央同地方政府好鍾意搵佢諮詢政策，佢咁出色，令到好多上市公司都對佢愛不釋手。於是佢就先後做咗16家唔同嘅上市公司管理層，最近終於出現第17家，搞到深交所要查個究竟。
最新嘅係旭飛投資，想請王曉濱做獨立董事，同時做埋薪酬與考核委員會委員一職。深交所驚佢太忙，會降低咗公司嘅管治質素。旭飛就回應，王曉濱喺嗰16家公司多數係「閒職」，唔驚佢履行唔到獨董嘅職責。睇嚟第17項任務，可能又係「閒職」噃。
獨董價碼有高有低，依家A股陸續出緊年報，發現出手最豪嘅係華發股份，獨董一年袋20萬人仔；畀酬金最少嘅係宇順電子，佢哋有位獨董只攞得四千蚊人仔咋。