絲絲講場：經紀最後一擊抗議加時

周一食飯時間拉橫額

該會會長林德明坦言，唔想就咁畀件事「鴉雀無聲」咁過，經過同理事會商討後，將會喺下個禮拜一「食飯」時間，約中午十二時十五分左右，喺港交所門口拉起「業界冇飯開 從業大控訴」嘅橫額，亦會帶埋「希特拉」同李小加、夏佳理嘅「人像」到場，除咗譴責港交所漠視民意外，亦會譴責政府唔理民意、民生等問題。

下個禮拜一咁啱係「驚蟄」日，佢哋會唔會乘機「打小人」呢？佢就笑答話唔識囉。

李小加尋日喺上海就話，將來會不斷檢視交易時段，既有可能完全取消午休，亦有機會恢復原狀，但強調依家睇唔到還原嘅理由。

佢承認措施嘅正面作用未必立竿見影，但市場必須要向前走，佢理解到前線經紀嘅憂慮，只能對受影響的人士表示歉意。