四月退任 接班人未定
但夏佳理強調，其繼任人選係由政府決定。港交所將會喺四月舉行股東大會，主席屆時會退任，而下屆特首如無意外將喺本月二十五日敲定，好多人都覺得，下屆特首嘅敲定，對港交所候任主席人選有好大影響性，故依家好多下任主席「浮面」嘅名都係揣測性，大家都係耐心少少等吓喇！
出席同一場合嘅港交所行政總裁李小加就話，同夏佳理合作愉快，覺得佢係一個頂天立地嘅人，小加並希望可以與下任主席繼續有良好合作。外界都估，夏佳理離任前會同李小加傾埋續約問題，觀乎李小加話好希望同下屆主席有良好嘅合作，佢續約已差唔多呼之欲出。