近日天氣開始濕立立，春天似乎已經嚟到。不過，內地樓市嘅冬天幾時會完都仲未睇到。絲絲最近就見到一則綠城（03900）嘅招聘廣告，上面就寫住「你若來了，便是春天」，而大家最關心嘅人工方面，更係「薪酬無上限」，好明顯老闆宋衞平希望利用經理人模式，可以扭轉依家嘅銷售僵局，藉此捱到樓市春天嘅來臨。
話說綠城今次想請300個金牌經理人，推銷能力當然係首要條件。不過無論你之前係賣一手樓定二手樓、抑或賣保險、靚車、化妝品，或者係金融產品，綠城都無任歡迎，當然擁有高端客源嘅梗係優先啦，即使係專職定係兼職都得，佢哋喺上個月嘅十八、十九日就喺杭州舉行咗個招聘會，吸引咗成三百幾人參加面試。
宋衞平呢個「全民賣房」嘅計劃雖然受到部分人嘅質疑，不過都總好過坐以待斃嘅，但係絲絲聽聞綠城依家喺杭州賣緊嗰十幾個樓盤都無咩點減價，維持原本折扣，加上佢哋又專賣豪宅，要喺淡市突圍，真係要「給力」一啲！