外國嘅公司好流行幫主要管理層購買責任保險，或者人壽保險，呢種情況喺香港較為少見。百利大（00495）尋日就公布，為旗下附屬公司嘅行政總裁陳德光，購買一項人壽保險，保單之應付保費為280萬美元（約2,178萬港元），個數大到要根據《上市規則》有關交易構成須予披露嘅準則披露。
保單持有人同受益人都係呢間附屬ac公司，所買嘅保險係傳統人壽同儲蓄壽險計劃嘅變形，保單之最終價值喺開始時唔能夠確定。點解要幫陳先生買呢份保險？公司話，保單嘅保險元素基本上為「主要人物保險」。陳先生係Paladin嘅行政總裁，董事會認為佢對公司恢復活力同增長十分關鍵。購買保險嘅目的，乃為陳先生一旦離世，可就可能蒙受之收入、增長及其他利益嘅有關潛在損失對Paladin作出補償，所以對公司有利。
保單亦包含投資元素，大部分保費會算作「存款」，公司可隨時提取存款，但會招致退保費。董事會擬持有該保單六年。
公司已經支付保費約280萬美元，其中196萬美元透過銀行融資提供。邊間寶號做到呢單大生意？咪係滙豐人壽保險囉。
余絲韻