市場熱線：中化肥國策受惠股

阿爺唔會整瓜樓市

歐洲同美國印銀紙立場一正一負，但金價突然插水，金股亦自然遭殃。朝早中國公布官方二月份PMI升到51，連出口定單都回升，但對個市冇乜刺激作用，跟住滙豐公布嘅中國PMI得49.6，唔知信邊個好。其他數據則令人失望，祖國二月新增貸款得5,000億人仔，香港一月零售額按年升14.9%，扣埋通脹得單位數字，農曆新年因素加埋天凍又落雨有影響，但零售業回落迹象愈來愈明顯。

內房股跌得甘過前日，原因係又傳房產稅，古勝唔相信阿爺依家會再落重藥，因為毒死班地主隨時亦毒死埋自己。祖國亦有傳媒報道房產稅消息，但內房A股不跌反升，內房比重較大嘅深成指尋日上升兼跑贏滬綜指。港交所（00388）下個禮拜縮短食飯時間半粒鐘話為咗中港融合，但A、H股根本各有各玩，連A50（02823）都係跟港股多過跟A股。

呢排業績股全部被質低，連渣打（02888）成績表咁靚仔都死，最慘係大昌行（01828），毛利仍可維持，但股價大插13.7%。炒業績冇一套準則，尋日中國動向（03818）死貓彈，皆因花旗唱好，中動向同李寧（02331）分別被花旗同高佬評為最「底」體育用品股，但如果其他體育股亦要減價，到時又係累鬥累。

利好因素開始浮現

過去15年開「兩會」做過統計，會前兩個禮拜有11次上升、4次下跌，而會後1個月得兩次下跌。兩會只係諮詢同提意見性質，但有分析話阿爺會喺會前會後製造「河蟹」氣氛，而且中國證監新主席郭樹清托市有膊頭、有腰骨，所以後市值得睇好。

開親大會例牌炒吓農業股同環保股，呢兩年炒埋水利股。農業股主要炒嗰3隻，一拖（00038）日前派成績表，竟然賺少24%，尋找原因包括少咗筆賣仔收益、毛利率下跌同埋新收購要蝕本；一拖舊年買咗間法蘭西公司，響應阿爺號召「走出去」，但外面風大雨大，唔同喺自己地頭有國策遮風擋雨，中法嘅管理文化又好唔同，真係無喇喇整撻癩。

另外兩隻係化肥股，中海石化（03983）已經有年幾時間唔上唔落，但都好過中化肥（00297）跌多升少，呢排雖然跟住個市反彈，但講升幅係大脫腳，由此觀測今個月份成績表打定輸數。不過，古勝成日話業績係舊時嘅事，新一年有新展望，隨住春耕開始，化肥需求回升，而庫存又處低水平，氮磷鉀等肥料陸續加價，中化肥亦隨時冬去春來。