盜版侵權官司全球案例目不暇給，正當深圳唯冠同蘋果公司iPad拉鋸戰打得如火如荼之際，一代NBA巨星米高佐敦（Michael Jordan）亦即將上場，單挑內地體育大眾品牌、準A股上市公司喬丹體育。
不過呢間強國企業早有預備，尋日喺官方網站極速回應，話明「喬丹」已跟足中國法律申請註冊，係享有專用權嘅註冊商標。
籃球傳奇人物Jordan雖然退咗役，但Nike旗下「Air Jordan」仲不斷出新產品發大財，所以為咗原則問題同保護自己權利，Jordan話已經向中國法院提出訴訟，指斥喬丹未經佢同意用佢個名做生意之餘，仲用埋球衣號碼「23」，連佢兩個仔嘅名都企圖唔放過。不過，喬丹尋日中午為止就仲未收到任何法院應訴通知。
喺舊年底上載嘅招股說明書中，喬丹寫到明風險因素包括商標及商號風險。雖然品牌所用「喬丹」、「QIAODAN」文字商標同Jordan中文音譯名「邁克爾 喬丹」姓氏相同，但就解釋話「Jordan」作為普通外國人姓氏，並不具有特定性，與「邁克爾 喬丹」不存在對應關係。