絲絲講場：荷蘭重視和電合作項目
外國駐港領事除履行外交事務外，亦肩負起促進與本港經貿合作任務，荷蘭駐港總領事舒鎮邦（Robert Schuddeboom）尋日最佳示範！事關佢尋日特別借出佢喺山頂金馬麟山道嘅官邸，畀和電香港（00215）同荷蘭嘅AMS-IX互聯網交換中心公布合作計劃，絲絲都有幸一探領事官邸嘅面貌。
領事官邸公布大計
荷蘭駐港總領事借出自己官邸，畀佢哋發布合作計劃，足以顯示荷蘭本身對今次合作嘅重視程度。和電旗下和記環訊國際業務總裁郭詠邦同絲絲講，AMS-IX喺決定同和電合作前，有東南亞國家嘅電訊公司，力爭與AMS-IX合作，和電今次「爭贏」對手，都可謂再次體現咗香港作為亞洲電訊樞紐嘅一哥地位。
以荷蘭為基地嘅AMS-IX，係歐洲最主要互聯網交換中樞，和電透過今次合作，除會將本身網絡與對方直接互連外，亦會喺本港設立AMS-IX HongKong嘅互聯網交換中樞，強化香港作為亞歐之間，互聯網數據通訊嘅中轉及接駁站角色，對一般網民來說，日後接入歐洲網站嘅速度及穩定性亦會隨之提高，有助提升本港電訊基建競爭力。