facebook兩個月前被企業評估網站Glassdoor，評為今年科技行業最佳僱主企業，即係話好受打工仔歡迎。
《第一財經日報》尋日有篇報道話，fb會喺內地搞首次嘅招聘會，唔單只人工高、福利好，仲話可以幫員工攞「綠卡」添，呢個消息迅速喺網絡界瘋傳。如果係真嘅，fb出年好大機會「冧莊」做最佳僱主o架！
報道話fb今年將喺全球招收約900位全職軟件工程師，去美國加州或西雅圖工作，亦睇中南京大學、清華大學、上海交大、復旦大學仲有浙江大學呢五所知名高校嘅學生。
除咗學歷要求之外，fb應聘考核亦非常嚴格：應聘者首先要經過兩到三輪嘅電話面試，仲要三輪現場面試同兩輪編程技術考核。既然要求咁高，fb出手都唔低。據報道話，薪酬大約係大陸知名IT公司嘅10倍，表現優異嘅話，現金股票加埋可以高達20萬美元；其他福利同Google差不多，而且員工可以辦赴美工作簽證甚至獲得美國綠卡。
有分析師話，呢個招聘可能係同fb睇重中國市場有關，fb上市後，要維持用戶數量同財務收入增長，中國市場咁大，可以幫到忙。正如創始人朱克伯格話齋「如果你遺漏了13億人的市場，還如何能連接整個世界？」
市場仲好關注fb嘅估值變化，而依家唯一可以倚靠嘅指標，都仲係私人市場買賣嘅價格，早前，fb嘅估值跌至低過一千億美元，但根據最新嘅成交價44美元計，估值又上番去1,030億美元，股東數目已增至逾1,000人。
余絲韻