絲絲講場：永隆張東動員全家行善
香港好講企業社會責任，今年至新上任嘅永隆銀行副總經理張東，喺上個禮拜日，就已經帶埋永隆成班同事玩慈善步行籌款，連老婆同囡囡都由深圳專程一大清早嚟香港，陪爸爸支持呢個活動。
慈善步行 籌20萬
絲絲聽講喺啱啱個周日，永隆有成百人參加咗呢個新界區慈善步行活動，佔成間銀行員工比例高達一成，都算多員工撐場。單計永隆員工，已經籌咗10萬蚊，加埋永隆嘅捐款，總共籌咗廿萬元。
張東話對於佢嚟講，慈善步行係新鮮事，見到個活動雖然有好多人參加，但係大家秩序良好。聽聞，嗰日個活動行程大約兩個幾鐘，但對佢嚟講一啲都唔覺得攰，因為平時佢都有行山嘅習慣。
其實永隆參加呢個活動，都唔止係社會責任咁簡單，仲可以歸埋做親子活動，皆因父女檔上陣嘅唔止張東，連永隆存款部主管龔志明都有囡囡撐場一齊行，你話咁做善事幾開心呢。
余詩韻