絲絲講場：「林瘋」過門不入 匹克腳軟
「林瘋」熱潮繼續紅爆全球，不過林書豪嘅品牌代言人爭奪戰，傳聞已經落幕喇！據講好想斟到林書豪嘅匹克（01968）、李寧（02331），輸咗畀國際品牌Nike。唔知係咪呢個消息影響，上周五大升嘅匹克尋日就回落番，收市報2.32元，跌咗3.33%。
絲絲尋日睇到《北京商報》報道，本身同林書豪仲有合約嘅Nike，已成功爭取續約，但係就冇公布到細節。雖然消息未得到Nike確認，不過有關Nike為林書豪設計簽名球鞋嘅消息，早已經喺網上瘋傳。
傳Nike續約成功 有排賺
話時話，Nike呢款名字命名球鞋相當把炮o架，喺籃球球星當中，只有米高佐敦、高比拜仁和勒邦占士呢三個人，咁睇來Nike都真係好重視同睇好呢粒新星。另外《福布斯》估算，林書豪目前嘅個人市場價值，已飆升至1,400萬美元（超過一億港紙）。
對於呢個報道，絲絲當然好想知道匹克有咩「落敗感想」，於是第一時間打去問吓，唔知係咪消息搞到佢哋心情麻麻哋呢？佢個秘書一聽到絲絲嘅來電就話唔得閒，仲收埋線添。不過，照絲絲計，其實球壇超級新星時有出現，今次唔得咪下次囉！