絲絲講場：恒生第三梯隊隨時候命
銀行界裁員潮喺今年都冇停過，以投資銀行戰況最慘烈。喺呢個時勢，肯拍心口話唔裁員嘅，應該唔多。尋日絲絲聽到恒生銀行（00011）執行董事兼財資業務及投資服務主管馮孝忠（Andrew），對住一班恒生管理學院嘅同學仔，斬釘截鐵話恒生今年無裁員o架，笑言「恒生係恒管最大僱主嚟o架」，聽到班學生哥幾開心呀！
馮孝忠：讀政治好過經濟
其實恒生喺最兇險嘅金融海嘯期間，都冇裁過員，依家氣氛亦冇當時咁惡劣，自然唔使裁員啦。不過，佢嘅答法，幾有幽默感。佢仲話，恒管學生係佢哋第三階梯嘅員工，即係話「大門為你哋而開啦」，各位學生哥，畀心機喇。
喺呢間學院讀嘅，好自然讀同經濟、財經相關學科，點知Andrew竟然話讀經濟無用，反而讀政治仲能夠預測到全球經濟嘅形勢，因為全球央行應對歐債危機，未必係以經濟因素考慮，係牽涉到好多政治決定。絲絲好認同佢嘅講法，但政治同經濟關連好大，兩科都咁重要o架。