港股加時大限三月五日就到，中小經紀都企圖喺下個禮拜「死線」前不斷製造「噪音」，引起公眾注意，對加時反對最激烈嘅證券及期貨專業總會會長王國安，決定將抗爭行動升級，計劃最快喺今個周日開始絕食抗議。佢諗住喺港交所（00388）門口「紮營」，聲言絕食一、兩粒鐘冇意思，最少都會絕食24至36個鐘，話係貫徹「甘地精神」，「要用生命換取行業嘅生命」咁話喎！
嘩！絕食成日幾兩日，分分鐘會頂唔住暈低？佢話暈咗仲好，最好到時call埋白車嚟送佢入院！佢坦言預咗絕食冇效果，但都要對會員交代。咁絕食同減飯鐘都係「冇嘢食」，有異曲同工之妙。
證券學會會長李細燕亦抱打不平，慨嘆經紀為咗加時搞到要絕食，都算係悲情，佢已諗住下周一收咗市去探望王國安，仲諗住帶埋水添。
中小經紀嘈到拆天，政府態度係點？尋日財庫局局長陳家強回覆立法會時話，港交所董事局經考慮後，決定將午休縮至一小時，只係為咗方便從業員至分兩階段落實。換句話講，經紀「你有你講」，政府態度照舊，撐飯鐘一粒鐘。七大經紀會今日亦會約見證監會行政總裁歐達禮，預料都會反映飯鐘時間、零佣金同牌費等問題。
絲絲好奇怪點解經紀唔玩「罷市」？王國安就話，C組市佔率雞碎咁多，尋日港交所最新公布1月份就只有9.98%，罷市有鬼用咩？咪盞自暴其短！