市場熱線：信義玻璃隨時撻着

滙豐二月中國PMI初值升至49.7，係四個月來高位，A股尋日再升至近三個月新高，對港股亦有帶動作用，中國證監會主席郭樹清新官上任三把火，仲搏命過香港個李小加，日前又放寬條例鼓勵大股東增持。老實講，A股今年到依家升唔夠一成，同其他新興市場印度、巴西升接近兩成相比仍係大落後。

三隻「化石股」可留意

恒指被大笨象（00005）拖累跑輸畀國指，而國指亦跑輸畀二三線股，單睇股仔以為個市升緊一千幾百點。最強板塊係內房股，上海畀持長期居住證滿三年嘅人可以買第二套房，市政府話其實政策冇變過，但問題係好多人未聽過就變成新政策，呢排任何風吹草動都會被視為阿爺鬆綁嘅暗示。

一啲「化石股」亦被發掘，古勝特別提出翔宇（00871）、中國金石（01380）同埋中國地板（02083）呢三隻半新股，全部都係上市後大潛水，升多幾成都有耐未返家鄉，後兩隻同樓市有關，分別做大理石同木地板，如果樓市冇起色亦唔慌升得去邊。不過，近排有單安信地板懷疑有甲醛新聞被煲大，搞到龍頭內房股萬科亦孭埋上身，潛在台詞係「便宜莫貪」，或者對中國地板會有利。

仲有乜嘢落後股？藥股？飛機股？如果純粹炒落後，古勝絕對唔反對，闔埋眼照衝可也。溫總喺收市後公布一五年醫改補助每人加到360蚊人仔，藥股今日可以等收錢。至於飛機股要承受高油價，歐洲伸手問攞碳稅，高鐵嘅威脅亦愈來愈大，睇落冇乜理由揀佢，但呢排一聲炒落後就揭竿起義，連金蝶（00268）尋日都升一成。

或再重啟分拆計劃

個市生猛番，除咗出現銀基（00886）大股東乘機抽水事件之外，一班舊年臨門撻Q上市不成嘅新股又想翻撻，例如光大銀行、三一重工、海通證券等，信義玻璃（00868）旗下嘅光伏玻璃業務原本亦交晒表，但又係生不逢時，今年遲吓又好有機會再上過。信義近期升幅唔算多，隨時借消息炒起。

玻璃行業今個月嘗試提價，但庫存高兼淡季，價格回升仲要等。玻璃呢種產品算係幾奇怪，金融海嘯搞到好多玻璃工廠停產，結果玻璃價格一○年大回升，信義股價由3蚊樓下炒到9蚊樓上，舊年九月重見3蚊樓下，可見起落幾大，現價4.93元連一半都未到，炒復甦概念制得過。隻股下禮拜一就派全年成績表，有人驚舊年下半年玻璃價格回落影響佢嘅業績，但「舊屎」嘅事沖咗佢就算，今年係另一個算盤，既然連大理石同木地板都炒得起，水泥股更不在話下，玻璃股又點可以唔預埋佢？