中環咁多裁員削成本消息，寫字樓租金又話跌緊，但原來國金（IFC）一啲早年定嘅長約，陸續響呢兩年到期，加幅就好驚人，絲絲聽到，依家租緊國金二期嘅瑞銀（UBS），十年長約明年到期，業主要求新租金跟返市價，但個加幅就嚇死人，竟然高達10倍！瑞銀發言人就話不予置評。
原來瑞銀早喺○三年新入伙國金，同大業主港鐵（00066）簽咗十年長約，租咗6層，大約14萬6千呎，月租470萬，即係呎租32蚊，但係計埋41個月免租期，圍埋月租即係300萬。
但聽聞港鐵依家話要跟番市價，新租金就要成3,000萬一個月，即係加租加成10倍，呎租差唔多200蚊呎，但由於國金嘅寫字樓好搶手，被喻為「有入無出」，所以200蚊真係市價。其實，瑞銀舊年都續咗租其中40樓全層，約2.41萬呎，月租已經加到168.5元。
雖然雙方仲傾緊價錢，不過相信減價空間唔大，絲絲嘅瑞銀高層賓卡都話相信要被迫就範，因為公司有二千幾員工，「大遷徙」唔係咁易，不過就擔心公司要進一步向內部員工「開刀」。
絲絲依家明白大摩、瑞信同德銀點解先兩年要勞師動眾搬過對面海ICC（環球貿易廣場），同樣係為咗享受新商廈嘅免租期同低租金優惠。