王石敢言作風人所皆知，自從佢去咗美國遊學之後，少咗聽佢嘅偉論。尋日王石大哥嚟咗香港，絲絲有「耳福」啦！有人提議既然內房喺調控措施下捱得咁辛苦，不如搞多元化啦，王石竟以死相諫。
王石話，萬科發展咗咁多年，全靠由多元發展逐漸成為專業化發展，如果以前有人叫佢將萬科業務多元化，佢會話等佢死咗先好諗，不過依家佢想法又唔同咗，如果有人要萬科改行，佢都會喺骨灰盒中伸手出來阻止，一句講晒，就係死都唔肯！
就係專業化，萬科成為內地首屈一指嘅地產商，王石話，唔少同行都以萬科為目標，想超越萬科。但佢認為，即使畀其他發展商追過都無咩唔好，依家萬科已經唔係一間只顧「數量」嘅地產商，同時亦追求「質量」。萬科舊年嘅銷售額已達1,200億人仔，佢重申至一四年，2,000億人仔銷售額應該唔係問題。
唔好以為搞地產嘅人眼中只有名利，淡出萬科王國之後，王石將人生比喻為拋物線，佢話，由低到高時，可以得到名利，但同時放棄咗享受嘅時間，而佢依家就係經過咗高處，逐漸向下，雖然名利減去，但係可以做佢鍾意嘅嘢，同時希望自己有朝一日「歸零」可以無聲無色。