的士司機近期成為大行報告嘅常客，繼里昂舊年坐的士感受深圳公路嘅車流量，今年到大和資本市場嘅分析員坐的士寫汽車股報告，仲要食過翻尋味，一個月寫兩次，今次嘅目標公司就係華晨中國（01114）嘞，不過睇嚟今次司機大佬嘅消息有啲流流地。
話說今個月初，大和嘅分析員特登去深圳搭的士，問司機對電動車嘅睇法，從而評估比亞迪（01211）嘅電動車會唔會廣受歡迎。今次鏡頭一轉，分析員就飛咗去瀋陽，向的士司機打聽華晨狀況，仲將的士司機個樣，登埋出嚟添。
第一站就去咗鐵西區，司機大佬就話鐵西區嘅廠房仲有一年先至可以建成，但當車駛到去門口，就見華晨嘅寶馬廠房已起好，好多旅遊巴載員工返工。第二站就去咗瀋北廠房，另一位司機就同分析員講，新嘅寶馬7系要兩年後先至投產。
咁樣道聽塗說，究竟有幾準確？分析員最後都要靠其他渠道攞料，首先向車行代理打聽，話現有嘅寶馬3系仲有好多零件待售，為免自己打自己，新嘅3系可能要遲啲先至能夠推出市場。最後當然要問番華晨管理層啦，從中得知公司大東區廠房嘅產能會由目前嘅每日303個單位增加至400個單位，只要噴油及引擎部門喺二○一三年建好之後，該廠房就可以獨立運作。雖然今次搵的士司機嘅效果唔係好得，但分析員呢種不怕嘗試嘅精神，係值得讚賞嘅！