利豐（00494）執行副主席馮國綸（William）今年貴庚？可能連佢自己都唔記得（又或者係特登唔記）。絲絲尋日去聽William講talk，原來尋日係佢「牛一」，生日都咁忙？William就好風趣咁話，其實自己自從60歲後都無咩點去慶祝生日，仲話連生日嗰日都唔想記起添！
William已屆花甲之年，絲絲睇番舊年四月出嘅二○一○年年報，就寫佢六十二歲，咁今年應該係六十三歲。以今時今日嘅標準，仲係好後生，絲絲知道佢有份參加渣打馬拉松嘅十公里賽事。
佢話唔記得自己生日都唔奇o架，公司年報列咗佢部分職務出嚟，佢出任公司董事及公職，超過十幾項，可能仲有一啲公職冇話畀大家知，咁忙有乜辦法呀。William同絲絲講，夜晚會同屋企人食飯！
William話要先小人後君子，因為利豐就快派成績表，所以唔可以答集團業務嘅事。至於集團有冇裁員計劃，佢重申冇呢個計劃。收購Sonia Rykiel呢？佢就唔回應。
William尋日係應亞太經合組織（APEC）中小企業峰會嘅邀請，分享「重新打造家族企業」嘅心得，搵佢講啱晒。佢話同佢哥哥（利豐主席馮國經）就正正係家族第三代，仲諗番當時屋企交畀佢哋兩兄弟嗰時仲係「小生意」，依家已經成為千倍規模嘅公司，照絲絲睇，其實後天嘅努力都好重要o架！