市場熱線：中國聯塑穩步上揚

利好消息已出盡

歐元區財長傾咗超過12粒鐘，到亞洲魚缸開市仲未埋欄，搞到港股自己嚇自己，以為又有變數，10點幾最多跌超過200點，跟住希臘一傳來好消息之後，即刻一支箭挾上，3點鐘A股以全日最高位收市，但港股好似行自動波，暫時唔知想點，但期指成交就去到接近10萬張，前日殺咗批熊仔之後，依家牛熊街貨相當平均，殺上殺落嘅誘因差唔多。

減存備率同救希臘都係預咗嘅事，短期冇咗呢兩個因素就要睇自己，淡友話超買，好友炒放水。好消息同壞消息純粹係觀點與角度，例如3G上客減慢，但尋日三大內地電訊股齊齊回升，祖國移動（00941）朝早一度跌穿80蚊後倒升，下月初開始賣「哎瘋」嘅中電信（00728）更升4%，其實賣「哎瘋」單消息早已流傳，前排仲有大行話中電信補貼手機「蝕頭賺尾」，所以調低公司呢兩年盈利預測。另外，國際油價因地緣政治緊張而上升，中石化（00386）股價跌仲可解釋為煉油業務虧損，但中海油（00883）為乜陪跌就較難明。

一向無厘頭嘅「甜甜系」尋日又集體起義，佢哋走勢一向係急升一輪跟住又回軟，亦冇乜原因解釋。堡獅龍（00592）同數碼通（00315）收市後派成績表，前者內地業務虧損擴大，抵銷香港區增長，搞到中期賺少咗。內地市場一向難撈，香港今年要捱貴租同人工上漲，零售股睇怕要告別高增長日子。

西部開發添商機

阿爺啱啱批准咗西部大開發嘅「十二五」規劃，但首要問題係解決交通同水利兩個樽頸，搞水利早已係國策，最重要係有水，其次係水管，所以中國聯塑（02128）舊年初炒《一號文件》炒到上接近8蚊，跟住開始洩氣，呢排跟住個市回升到5蚊附近有回吐壓力，但未見有散水迹象，尋日收報4.77元，如果能突破5蚊關口，應該仲有得玩。

聯塑做膠管，塑膠成本係原油，油價升會加重成本壓力，舊年上半年毛利率跌到23.7%，令到盈利增長得11%。依家油價咁高，毛利率能否維持要睇規模效應同埋將成本轉嫁畀客戶嘅能力，而內地嘅趨勢仍係「以塑代鋼」。公司今年上半年亦會有陝西生產基地投產，有望配合西部大開發齊齊發展。

但另一方面，內地樓市未有起色，增長可能要較倚重保障房。聯塑下個月派成績表，PE應該仲係單位數字，祖國大力投資水利建設點都會有幫助，所以要睇住隻股能否突破5蚊水平同埋條250日線。