孖妹缸湖遊：高科技交易Vs傳統投資智慧

講到高科技交易，孖妹相信好多散戶都唔知係咩東東？不過，我哋人脈夠廣，識到財金新書《微觀看勢》嘅作者陳建良，佢有十幾年港股投資經驗，喺○八至○九年金融海嘯期間，其管理嘅基金業績仲跑贏同行，獲得超過兩成嘅年度化回報，資產淨值率更創出新高。重點係，依家佢係利用高科技去協助投資做交易o架！

陳：睿亦嘉科技董事總經理陳建良

分析資訊更快更準

高妹： 你連間資產管理公司個名都有「科技」兩隻字，咁真係要講吓你點樣利用高科技去協助投資買賣喇？

陳： 我哋係間對沖基金公司，以量化投資理念去建構投資組合，但當中會利用科技化嘅電腦模型數據分析去協助投資。不過，現時有絕大多數人都以為數據分析就係睇圖、技術分析，其實兩者完全係兩碼子嘅事。例如我哋去研究一個數據，可能係研究行業趨勢、估值平貴、咩現金水平叫做健康等等，呢啲都屬於基本因素，透過科技方法去研究公司嘅財務報表數據，繼而去估量佢本身係咪可以健康發展。

咁當然我唔排除會有技術分析嘅研究，因為股票係短期之內會有趨同效應，當升或跌嘅趨勢形成，就會造就市場上一群跟風者去炒賣，而當資金非常充裕或非常不充裕時，呢個趨勢就會延續，所以我哋都會留意埋呢啲因素。我相信如果無科技去幫助運算，你都幾難去計算呢啲資料出來。我唔係話用人腦計算唔到，只係港股數量過千隻，當面對咁強大嘅數據量同埋交易量，咁你又點靠人腦去應付呢？

高妹： 但聽講高科技可以幫你搵到入市時機，甚至話畀你知買邊隻股票喎？

陳： 我哋所應用嘅科技可以分為前台同後台，而入市訊號、選股呢啲就屬於前台科技。作為對沖基金，我哋每日嘅買賣交易量一定比散戶為多，為咗能夠百分百準確去保障客戶利益，我哋每次進行嘅買賣交易，都會通過電子科技直接去到一個結算箱，令交易與結算過程同時進行。即係話，我哋唔需要等到收市後先知成個投資組合嘅情況，即使有日我哋大幅加倉或者大幅減倉，甚至同時出緊四至五十條買賣盤，我哋都能夠知道實時反應，並作出實時應變策略，盡量減低客戶所要承受嘅投資風險。

高妹： 原來前台科技係咁解嘅，咁後台科技又負責做啲咩呢？

陳： 後台科技主要做風險管理，例如透過科技運算去肯定基金客戶嘅資產淨值準確無誤、報表數據係咪正確、對沖下行風險、系統性風險以及減輕交易對手風險等功能。不過，你要記住，高科技只係協助整理數據分析嘅方法，要知道電腦只係計算叻，但佢絕對唔擅長做決定，所以幾時買貨、買咩貨、買幾多股數等，所有投資上嘅決定，都係由我哋人腦去做，而電腦只係負責執行買賣。

高妹： 咁我想問吓你呢套高科技賣幾錢架？

陳： 幾百萬港紙喇！我唔係話你買唔起，但係買咗都要識用至得架；同埋你要諗吓係咪真係有呢個需要先？另外，除咗買外國嘅投資科技之外，我哋都有資助本地大學去開發自己嘅投資科技。

縱橫股壇廿年嘅恒豐證券研究部董事林家亨向來敢言，原來佢對高科技交易都有啲睇法，仲坦言：「講穿咗，高科技咪即係好似個衞星導航系統咁，提供一啲投資指示或者買賣建議畀你，不過電腦程式咪又係由人去開發、去寫，所以我始終相信用人腦去做投資，比較快、靚、正！」

林：恒豐證券研究部董事林家亨

人腦善解隱藏訊息

祺祺： 以你所言，即係高科技交易敵唔過人類嘅投資智慧？

林： 用人腦去做投資都唔會百分百準確喇，何況用電腦？而且電腦分析程式都係由人手去寫！不過科技都有級數之分，其實依家市面上都有各式各樣嘅技術分析軟件出售，由最基本嘅趨勢線、平均線，甚至用電腦去揀股、模擬買賣都有，有啲仲可以設計埋合乎你個人需要嘅選股同分析條件添。

祺祺： 我唔理高科技定係低科技，總之幫到我炒股賺大錢就係好科技！

林： 高科技電腦分析程式只能夠察覺到市場數據及模型，但察覺唔到市場傳言或者新聞事件。如果有間銀行突然配股，你本來諗住入貨嘅，但個天然人腦會同你講：「睇定啲好喎！」咁買就有可能變成唔買；相反電腦就唔會思考配股背後嘅意義，當佢設定咗個買入盤，到價位就自然會幫你買嘢，速度係快，不過唔代表呢個投資決定係啱囉！

祺祺： 咁高科技分析同埋傳統技術分析，又邊樣勁啲呀？

林： 喺各種技術分析之中，唯一我最信嘅就係道氏理論，當散戶知道股市係牛定熊，了解咗大投資趨勢，贏錢機會自然增加；相反由市場因應需求而供應出來嘅其他技術分析，以其去預測股市上短線嘅方向，我認為命中率只係一半一半，咁不如信自己嘅眼光同分析。

你會認購今輪新股嗎？

港股氣氛轉好，新股陸續排隊上市，不乏影視、糕餅烘焙等較特別的行業。加拿大石油勘探商陽光油砂（02012）擬於本月二十日起開始招股。你會認購今輪新股嗎？據今期《東方產經》網上民調，截至上周末晚上六時嘅結果顯示，17.3%表示「會」，82.7%表示「不會」。

高妹、祺祺

若有料報畀高妹同祺祺或有嘢問，可電郵money.biz@opg.com.hk