市場熱線：國壽升得有道理

減RRR單嘢由聖誕節講到過咗年成個月，當大家覺得放水力度減慢嘅時候，阿爺突然有驚喜畀大家，內銀同內房可以沖喜吓，尤其內銀仲未返到上次高位，古勝短線心水係中信行（00998），喺5蚊樓下已整固咗幾耐，隨時會有突破。

止賺位再提高

今日話歐元財長會落實放水畀希臘，單嘢拖完又拖，好在個市都係大漲小回，所以唔介意長玩長有。道指上周五晚創近四年新高，標指亦創三年新高，今日美股休市冇咗指路明燈，要睇A股對減RRR反應係點，但A股唔能夠以常理去推測。

世上冇只升不跌嘅股市，打波亦冇長勝將軍，「零輸豪」終打爛齋缽，「林瘋」狂熱睇怕要降一降溫。傳聞祖國體育品股齊齊爭呢位紅人，匹克（01968）上周五因此大升8.5%；林書豪代言人身價只係400萬美金，但炒作價值就好高槓桿。有大行分析話體育用品股出高價搶贊助其實係累鬥累，好似安踏（02020）贊助國家隊，今年就要使幾億宣傳（倫敦奧運關係），對股東荷包冇jetso。

安踏今日會派成績表，除咗睇盈利之外仲要睇存貨數字；同日放榜仲有光國（00257），呢隻自從做咗「垃圾股」，即垃圾焚燒發電之後，走勢當堂靚仔晒，但德銀話隻股已升到價，目標價只係3.3元。

放榜期陸續有來，聽日就有數碼通（00315）、堡獅龍（00592）、神數（00861）等，思捷（00330）係禮拜四，今年唔使大撇帳之後，計落PE都係10倍左右，有人話仍然係好抵，但今年至今已升咗5成，而次次派完成績表之後股價都瓜多過菜，所以古勝建議無謂高追喇。

上周五晚ADR有個怪現象，主要升大笨象（00005）同祖國移動（00941）兩隻，上周五勁升嘅壽頭（02628）亦有回吐。壽頭都算醜股大翻身嘅例子，舊年全年保費收入幾乎冇增長，但一月增長達12%。其實醜股翻身主要係「知恥近乎勇」，舊年太差自然要搵方法改善，所以喺新業務推動之下能夠回復增長，亦係所謂「最壞時候已成過去」。

最壞時間已過

原來一月普遍係保險股嘅旺季，可能係「一年之計在於春」，所以買保險股亦趁年頭，加埋A股年初回升，保險股升得有道理。壽頭保費收入增長仍然唔及平保（02318），但由0變12%，已經令市場喜出望外，隻股差唔夠1蚊就可衝破250日線，醜股翻身唔可以睇小，壽頭今年靠sales團隊會帶動收入增長，依家買入未算遲。

古勝