上個禮拜內地其中一個最具票房號召力嘅大導演馮小剛，喺微博度呻「想同電影講分手」，搞到擁有佢作為「核心競爭產品」嘅華誼兄弟，股價即刻腳軟。屈指一算，短短三個交易日，華誼股東嘅荷包就縮水3.2億人仔。
馮小剛係華誼台柱，好多作品嘅票房都有「好幾個億」，為華誼貢獻七成嘅電影收入。就係因為持續拍戲三個月，佢大呻「對電影的愛愈來愈淡，對這樣的生活也開始感到厭惡，也許真的到了要和它說分手的時候了」。
就係呢一番「唔想撈」嘅心聲，引發網絡、影視圈同股市嘅連鎖反應，上個禮拜華誼連續三日跑輸大市。可能冇諗過外界嘅反應咁激，馮小剛隨即喺微博「更新」最新嘅心情，直指係自己非常情緒化嘅直抒胸臆，連累華誼股價受創。
佢仲話自己唔係一個自私嘅人，會尊重同華誼嘅合約，仲會全力、高質咁履行合約。最後仲調侃自己，「就當我喺微博度詐嗲一次喇」。馮大導「嗲」一次，佢揸住華誼嘅股票都蒸發咗304萬人仔，不如下次直接打電話畀老闆王中軍喇，咁大家都冇咁傷吖嘛。