大家仲記唔記得舊年尾，一班會計界改革派要求一人一票選會計師公會（下稱會公）會長（依家係由理事會選出來），會公因此要召開EGM表決呢個議案。
近日會公行政總裁張智媛出咗封信畀會員，交代番當日嘅詳細情況，絲絲發現當日EGM只開咗一個鐘頭二十分鐘，但就使咗公會106萬元！即係話，每分鐘要使成1.3萬元！
最諷刺嘅仲要係，提出呢個議案嘅人士當日大部分都no show（冇出現），整個EGM竟然冇人就支持議案發言，但會公就「大嗱嗱」使咗過百萬元！呢啲唔係叫「勞民傷財」，仲可以用甚麼形容詞？絲絲心諗，會計師唔係一向都好注重成本效益㗎咩？
張智媛喺封信度都話，預咗喺EGM上，可以同提出者進行討論，結果佢哋缺席，唔能夠聽到佢哋嘅意見。至於會公使咗成百萬元，佢就話應由會員評價以EGM形式進行類似議題，係咪使得有價值？
睇番嗰100萬點使？主要係法律方面嘅開支，要成43萬元；EGM通知、授權書等要成19萬；郵費16萬；點算投票費用10萬；網上廣播設備8.6萬元等。
最後議案以964票贊成，1,250票反對，唔獲通過。絲絲就大惑不解，雖然明知勝算有限，但主張改革向來都唔會放過任何辯論嘅機會，當日集體no show，唔通仲有其他目的？