市場熱線：東風盈利有保證

希臘過咗自己嗰關，呢個禮拜仲要過歐盟同債主兩關，歐盟暫時仲未敢冒險，所以要繼續畀希臘吊鹽水，希臘單嘢一過咗骨，到月尾又有長期再融資操作（LTRO）1萬億歐元「新水」冲到，個市連「恐慌」都冇乜藉口，到時豈非可長驅直進兩萬二？不過，個市要插亦唔使乜嘢理由，所謂「相反理論」就係人沽我買、人買我沽。

數碼通搶閘蝕底

朝早個市明顯係被內房股拖累，蕪湖市夠晒「模糊」，連阿爺個底未摸清就話救市，結果被叫停累埋內房股插多兩錢重。內房股無論對好消息抑或壞消息都相當敏感，市政府、錢莊同地主佬不斷想試阿爺底線，但溫爺爺適當時候就會講兩句撲火，所以只適宜炒上落。

尋日係電訊商「晒冷」嘅最後日子，4間電訊商都有唔同plan，客戶可根據本身用量需要揀合適電訊商，但最先公布嘅數碼通（00315）最蝕底，最貴嘅代價可能係被搶客，至於ARPU上升可唔可以抵銷客戶流失則係後話，但數碼通尋日仍升2.2%，和電（00215）則創新高。無論乜嘢plan，數據用量只會愈來愈多，尋日炒到兩隻光纖股：中國光纖（03777）同昂納光通信（00877）。

雨潤（01068）又有大屠殺，有心臟病嘅股民千祈唔好買呢隻股票，但亦可能係趁今年將衰嘢一次過撇晒嘅伎倆，不過連芬佬都唔知公司搞邊科，做散戶更加係斷估。

整體表現夠穩定

唔使靠估嘅係車股，亦係今年初表現最好嘅板塊之一，而頭3位跑出嘅係比亞迪（01211）、吉汽（00175）同廣汽（02238），同舊年排名啱啱相反，完全符合「衰股」理論，舊年推出新車，今年先有收成。例如吉汽阿媽買咗「富豪」之後都要時間吸收對方技術，而吉汽兩款新車喺舊年尾得到歐洲撞擊安全測試分別4粒星同5粒星評級，證明國產車唔係淨得「低價」兩個字。

股價上嘅「跑車」肯定非比亞迪同吉汽莫屬，但穩陣派嘅首選仍係東風（00489），無論銷量同盈利都好穩定，合資車廠、車類型同車款亦最多，一一年PE唔夠10倍，當然同舊年低位相比已差咗5成，但依家嘅港股估值同氣氛亦大不同。環顧港股，PE仲係單位數字兼有咁上下規模已成為罕有。比亞迪同吉汽炒復甦之下，呢排後來居上，但復甦可能係一廂情願，不如揀番盈利有保證兼估值低嘅東風更加吸引。