王美珍過檔大新
老友同絲絲講，阿John已經喺今個月一日Last day（最後一日上班）。絲絲聽到都好愕然，皆因過年之前嘅聚會，阿John先帶同一班管理層出嚟拜個早年，估唔到咁快就離開咗大新銀行。
阿John出晒名對零售銀行業務經驗豐富，喺二○○五年加入大新銀行之前，做過滙豐同恒生幾家大銀行，對本港市場相當熟悉；唔知佢今次離職，會打算抖抖歎吓世界，定係被挖角跳槽呢？
話說回來，近排大新銀行嘅高層相當「活躍」，前排阿John愛將陳偉思（Vivian）先過檔星展香港，擔任零售銀行業務存款及有抵押貸款高級副總裁，依家阿John又走埋，王美珍上場後，又會唔會帶嚟新人事新作風呢？
余絲韻