尋日市況，可以用雞犬皆升嚟形容，股價冇一成半以上升幅，都冇資格入十大升幅榜。面對呢種「高追要有相當勇氣，唔買又怕對唔住自己」嘅市況，折衷辦法，就只有從落後股入手。
中國電力新能源（00735）去年十二月獲長江三峽集團以高溢價入股，刺激股價急升上0.4元水平，但之後就持續橫行，尋日收0.385元，較長江三峽集團的0.65元出價仍低四成。
估值偏低的情況，其實亦並非無理由，事關公司去年上半年業績倒退，純利跌27%，而且去年內地乾旱，令其水力發電量下跌達43.2%，全年業績料亦難有大起色，加上旗下不少項目處投資期，令集團去年六月底借貸比率高見九成。
不過，內地今年一月開始大幅調高可再生能源電價附加費，有助集團盈利，而配股與長江三峽集團集資21億元人民幣後，早前又成功發行8億元人民幣債券，財政實力改善之餘，未來亦不乏注資機會。股價若成功突破0.4元，可向0.44元推進，支持位則在0.36元。