絲絲講場：雅虎主席辭職信爆猛料
雅虎（Yahoo）董事會嘅地震停不了！繼「雅虎酋長」兼創辦人楊致遠喺上月請辭後，包括主席博斯托克（Roy Bostock）同董事局內另外三名資深董事都劈炮唔撈。博斯托克仲喺辭職信中爆料，話公司正同「亞洲嘅合作夥伴阿里巴巴和雅虎日本就持股重組嘅可能性進行積極嘅討論」，似乎預示傳聞已久嘅亞洲資產拆骨交易好快會成事。
與阿里軟銀斟重組
其實喺楊致遠早前宣布離職時，已經有傳聞話博斯托克等人亦會離開董事局。將加入董事局嘅兩名新董事中，曾任eBay營運總裁嘅Maynard Webb，更係雅虎行政總裁湯普森（Scott Thompson）嘅舊拍檔，明顯反映雅虎已進入「湯普森年代」！
博斯托克喺信中話，喺決定請辭前，董事會已經完成全面戰略審查，但至今睇唔到任何對股東有較大吸引力嘅提案，又話雅虎正同亞洲嘅合作夥伴阿里集團及日本軟銀（Softbank）就亞洲業務持股重組嘅可能性作積極討論。雖然佢一再強調，唔保證交易能夠落實，但市場就已經盛傳，阿里同雅虎會喺三月「分道揚鑣」，買番雅虎持有嘅阿里股份。