市場熱線：東岳向高位邁進

港股對住A股嘅態度係「跟升唔跟跌」，A股呢排似無定向風，希臘又話有進展，呢類「狼來了」故事不知聽過多少次，但今次歐元係堅升到1.3270。今日祖國公布CPI，坊間預測係4.1%左右，但股民最關心係幾時減存備率啫，不過以前日阿爺啟動央行票據正回購嚟睇，可能仲要等。

家電補貼再惹遐想

有人話祖國嘅經濟數據信唔過，所以寧願信發電量冇花假，上個月內地發電量罕見出現7.5%負增長，當然最主要原因係今年一月放農曆新年假工廠停工所致，但負增長仍係少見。龍源（00916）亦公布一月發電量竟然大跌14.85%，瑞信又竟然唱好。

出現倒退嘅仲有賣車數字，一月乘用車銷量按年下降16.5%，又係話同農曆新年有關，但到今個月有預測會增長30%，所以年初數據應該用一月加二月去做兩個月對比。另一樣一月銷量肯定倒退嘅係家電股，皆因農曆新年因素同以舊換新政策取消，但有證券行預測會有新家電補貼措施出台，汽車股同家電股尋日齊升到甩轆，最威係志高（00449）同海信科龍（00921）兩大盈警股。

依家個市升到呢階段，變成愈墮落愈快樂，升幅榜亦見到建滔積層板（01888）同綠城（03900）呢類發霉股。當然，比起早幾日細價股當道嘅日子，尋日升幅榜嘅「市值」大增。尋日連飛機股都升，飛機面對成品油加價同歐洲碳排放稅兩樣成本增加，但仍然飛得起。另外，祖國首套房按揭利率打85折，內房股咁多月以來第一次有好消息，但阿爺只係益首次買樓嘅用家，冇迹象話鬆綁。

做冷氣機同雪櫃嘅志高同科龍勁升，自然令人聯想起東岳集團（00189），因為公司係做製冷劑。製冷劑舊年價格先高後低，總結全年，R22同R410A均跌超過三成；但踏入二月係製冷劑旺季，因為冷氣機要生產備貨應付夏天需求，所以製冷劑價格應會回升。

捉緊製冷劑新形勢

東岳日前發咗盈喜，但一一年上半年所賺已多過一○全年接近1倍，所以其實「阿媽係女人」。舊年下半年盈利應該同上半年差好遠，但計PE仍算幾低，今年要睇製冷劑價格走勢。一一年上半年係「意外之財」，因為全球逐步淘汰R22，而生產企業減少反而令R22價格暴漲。依家企業紛紛開發新製冷劑，東岳亦生產其他R22替代品，再加埋發展新材料業務，將可捕捉製冷劑形勢新發展。東岳呢幾日升穿7蚊嘅上次高位，略經整固更加健康，既然志高同科龍都炒得起，得幾倍PE嘅東岳要預埋一份。