絲絲講場：中銀百年紀念鈔即「升值」
中行（03988）喺前日（五號）100歲生日，慶祝活動一浪接一浪。重頭戲就係由阿仔中銀香港（02388）喺港、澳兩地發行100元紀念鈔，18歲以上人士可以喺今個月十三至二十日出動認購。
面額100元賣百五蚊
中銀香港上一次發行紀念鈔，就係全城熱搶嘅奧運系列，相信當時唔少人都試過日曬雨淋排隊認購。今次認購方法就有少少改變，100元單鈔就喺指定50間分行派籌購買，每人每次只限買兩張，每張盛惠150大元。
至於收藏家至愛嘅三連張，以及整版三十連張，就要好似認購新股咁，填表抽籤認購，所以要有香港地址先買得㗎，因為抽中咗要憑換領信去買。不過價錢就唔平咯，三連張要600大元，整版三十連張更係索價6,000元。
百元紀念鈔喺香港發行200萬張，澳門就發行300萬張，中銀香港發鈔主管謝兵話，200萬張數量恰當，唔會加碼，但唔評論澳門嘅情況喎。
余絲韻