曾經係內地基金愛股嘅重慶啤酒，自從乙型肝炎疫苗研發出問題之後，股價由高峰期嘅八十三個幾（人民幣‧下同），一路跌到依家唔夠廿四蚊，已經成為基金經理嘅「心裏最痛」。
今日重啤要開臨時股東大會，持重倉嘅大成基金事先張揚，會由首席投資官劉明拉大隊出席，令市場高度關注大成基金係咪會一如傳聞，聯合其他股東罷免重啤嘅董事長黃明貴。
重啤炒作乙型肝炎疫苗概念十幾年，股價由九八年到舊年泡沫爆破前累升超過五倍，到舊年九月尾，有成廿隻基金十大持股名單上仲見到重啤嘅身影。所以泡沫一爆，威力驚人，持股最多嘅大成基金，帳面虧損一度高達二十億元，簡直係痛到入心，難怪要喺舊年十二月提出罷免重啤董事長嘅提案。
雖然大成基金喺舊年第四季已經大手減持重啤，不過到年尾時旗下仍有超過千五萬股股票，市值接近四億元。內地股評人都覺得，今次由劉明拉大隊參加「逼宮」大會，應該都係想為基金嘅巨額虧損搵個「代罪羔羊」，畀投資者一個交代。
余絲韻