阿里巴巴集團主席馬雲唔止識做生意，原來係臥虎藏龍嘅高手。內部員工就爆料，話馬雲係太極拳嘅粉絲。舊年四月馬雲就同武打明星李連杰合資搞咗間太極禪文化公司，最近呢間公司公開請人，決定要搞大佢。
身為太極禪公司CEO嘅李連杰喺微博話，呢間公司以人人健康快樂，弘揚太極禪文化為宗旨。咁究竟要請咩職位呢？絲絲上過呢間公司嘅網頁睇過，職位包括營運、培訓、推廣三個部門嘅經理，網站編輯同總裁辦協調人，希望應徵者有三年或以上嘅工作經驗，但就冇講明要識得耍太極喎，唔知大家有冇興趣去應徵呢？
據了解，太極禪公司係馬雲嘅私人投資，唔涉及上市公司。但內地媒體引述阿里巴巴公關部嘅發言人話，馬雲經常喺自己辦公室練太極，有時開會傾傾下會突然起身耍一套太極拳去整理思路搵靈感。馬雲去年仲喺公開場合講過，自己無論喺內部管理員工同客戶、以及反競爭者嘅關係，幾乎完全係按照太極嘅宗旨。咁希望佢接受傳媒同客戶查詢時唔好耍太極就好咯。
余絲韻