絲絲講場：「巨人」年輕化 27歲仔揸旗
「80後」同埋「90後」年輕人，成日畀人批評好唔掂，一竹篙唔能夠打晒一船人嘅，好似科網行業咁，一向都係年輕人創業嘅天下，八十年代有喬布斯、蓋茨；千禧年代有楊致遠；最近就有facebook嘅朱克伯格。內地巨人網絡嘅史玉柱，似乎亦深明此道，佢近日就成功向同業挖角，宣布任命年僅27歲嘅吳萌出任副總裁，成為巨人網絡首位「85後」高管。
數數手指今年48歲嘅史玉柱，九十年代初都係30歲出頭首次創業致富，及後幾經起伏，踏上科技創富之路。舊年佢喺微博中高呼長江後浪推前浪，明言巨人網絡要大膽起用年輕人，足以顯示佢一早已揸定主意，公司一定要透過管理層年輕化注入動力。
吳萌屬內地IT新星
講番今次被史玉柱挖角過檔嘅吳萌，除之前原任內地動網先峰嘅總裁外，亦係《商業大亨》、《超級明星》等網上遊戲嘅製作人，亦曾創辦網上社區「番薯窩」並擔任CEO，喺內地IT界亦屬新星之一。
吳萌嘅加入，亦正好配合巨人網絡強化網上遊戲開發及移動網遊業務嘅發展策略。
余絲韻