市場熱線：首鋼資源接力炒上

尋日腳軟冇乜藉口，最多係驚希臘傾唔掂數，雖然希臘成日話「好快」搞掂，但傾咁耐即係證明有暗湧。港股尋日再有32隻恒熊陣亡，雖然自高位回落300點，但睇番呢個升浪，每次亦最多回落兩、三百點又再升過，所以暫時未足懼，個市仍係輪流炒落後，大落後嘅藥業股繼續添食，但兩大紙股就由高位sir滑梯。

衰股都升要小心

雞犬皆升一向係大市見頂警號，尋日有47隻股票升一成以上，新時代能源（00166）獲彤叔買咗17球後，股價3倍膨脹，連啲南海石油（00076）同林大（00910）都喺垃圾筒摷出來炒。世達（01282）同浪潮（00596）齊發盈警拖累股價下跌，但兩間公司截至舊年中分別有6億幾同13億幾現金，後者現金更高於公司市值，至於未來現金會唔會「蒸發」則唔敢包。不過，就算雞犬皆升都會維持一、兩個禮拜至到個市見頂，音樂椅幾時停就各安天命。

一二年睇落得電訊股、食品股同電力股會有較好前景，但此前途不同彼「錢」途，前兩類股今年跌到趴街。孖屐依家轉玩盈警股，鞍鋼（00347）、中海集運（02866）呢類最好，盈警之後即係無後顧之憂。呢排上市公司10間有9間發盈警，計估值，其實二萬一至二萬二已係頂晒籠，只係有鐘擺因素，唔知擺到有幾高。

庫存回落需求增

依家潮流興闔埋眼玩落後股，古勝覺得首鋼資源（00639）有諗頭，黐住條上升軌一路上。公司係做焦煤，焦煤用來煉鋼，鋼企舊年第四季蝕入肉，所以焦煤價格亦從高位回落，澳洲焦煤依家已跌到每噸1,600蚊人仔，內地煤價亦存在壓力。不過，隨住用煤客戶鋼材庫存回落，所以需求會漸次回升。

首鋼資源舊年上半年成績表相當唔錯，營業額升53.3%，純利升35.2%。「你戇」上月尾發報告，同首鋼管理層接觸所知，話公司舊年下半年營運數據仍然強勁，而公司不斷進行回購亦係信心嘅表現，所以畀首鋼嘅目標價係4蚊。

首鋼資源由首長國際（00697）揸住29.41%股權，咁啱得咁蹺，首國揸首鋼嘅市值就等如本身市值，但控股公司要計3成折讓，而且首國有大筆負債，而首鋼則有大筆淨現金，講穩陣一定揀首鋼，全年成績表亦應該唔錯。

古勝