日日要開會，不過會議中同咁多友人們交流，確實得益唔少，亦搵到好多新觀點！講番呢排個市，都有唔少新股！最近一隻比較特別嘅就係必瘦站（01830）。同必瘦站業務有關嘅公司，大家最有印象嘅可能係現代美容（00919），上市之後表現都算係咁。今次必瘦站上市，想必然有備而來。
依家國際配售方面，必瘦站已有超額一倍認購，今次上市都會水到渠成。最好意頭嘅係，必瘦站大有可能成為龍年首間上市公司！集團大力拓展自有品牌「必瘦站」。以「必瘦站」作為品牌嘅服務中心，由○九年嘅一間增加到目前44間。今次上市集資，睇嚟就係想將呢個藍圖再擴大，高速再喺唔同嘅中國市場開分店！
睇番必瘦站招股文件，集團純利○九年財政年度為2,860萬元，一一年去到5,000萬元左右，都增加咗近成倍。大家都知道香港貴租，所以公司依家開展緊嘅中國策略，集中發展內地市場，其實方案非常之正確！集團將借重中國較平嘅經營開支，慢慢將主要盈利重心轉移到中國市場。
公司將會由一二/一三年度開始，將每年利潤100%全部派息。睇上嚟，公司已有既定計劃，今次上市只係一個手段開始，達到管理層擴張規模嘅目的！繼續追蹤、出發！