微博吸納「粉絲」嘅威力非同小可，唔少內地房地產公司嘅老總都鍾意用嚟與天下網民打交道，甚至爆料，搞到中證監都話要研究吓，呢個渠道係咪要納入「監察」範圍。香港地精明嘅企業又點會執輸呢，恒地（00012）銷售部就嗱嗱聲喺微博開番個Blog叫「HLD_房產資訊」，主動走進消費群。
喺網絡世界，醜事傳千里嘅例子見怪不怪，不過，有危就有機，尤其係推廣銷售嘅商機，依家好多商場同樓盤，為咗吸引人流同生意額，都會早着先機。
好似恒地咁，不單止設立自家網頁，仲相當醒目咁識得延伸曝光率至社交網絡微博同埋facebook，感覺親民兼時尚，形象又加幾分喇。
近期喺facebook見到恒地新春團拜咁熱鬧，更加令絲絲忍唔住「讚好」。不過，睇到佢嘅基本資料，喺關係嗰欄寫「交往中但保有交友空間」，就最令絲絲覺得耐人尋味。