絲絲講場：摩根資產「生肖毛公仔」多人like

一年限出一款

不過，估唔到原來唔止絲絲一個係咁諗，好多投資界嘅老友都鍾意，而且仲有「儲齊一套」嘅嗜好添。絲絲講緊嘅係摩根資產送足十二年嘅「生肖毛公仔」。

據摩根資產嘅公關大員丹尼爾講，呢個毛公仔啱啱輪咗一個「圈」返番轉頭，已經係佢哋喺農曆新年搞event嘅「標誌性」小禮物。

聽講，早前當摩根資產喺農曆新年其他場合，送另外一款禮物時，即刻有好多人都關注呢個「小禮物」係咪已經斷咗市，仲有啲粉絲，專登喺農曆新年前，就已經打電話畀丹尼爾「查詢」添，直頭好似啲年息過十厘嘅金融產品咁受歡迎。

不過，呢種生肖毛公仔一年先至出一個，要儲齊一套最少都要十二年，唔係人人都儲得齊！

就連可謂「行內無人不識」嘅丹尼爾都同絲絲講，佢都差兩隻先至儲得齊；絲絲咁「後生」，梗係仍須努力啦。