中國好多傳統都好值得保留，金利豐金融（01031）主席朱沃裕同埋老婆李月華都好認同，仲出錢出力添。佢哋有個習俗，喺農曆新年首日開工着中式服裝返工嘅同事，除咗有開工利是之外，仲會額外有多一封利是，所以過年時公司特別多人着中式服裝。咁又係，都係應吓節搞吓氣氛，大家開心啫！
尋日上市公司商會搞咗個春茗酒會，朱生朱太仲齊齊着咗醒目耀眼嘅中式服裝出席盛會，朱生以橙色為主，朱太就係深紅色，朱太嗰件更係喺北京度身訂造架。朱生仲話，今年仲安排咗由管理公司負責派人上嚟公司舞獅慶祝新年，氣氛熱鬧，職員同客戶都不知幾開心！
朱氏伉儷今個新年去咗澳洲度歲，朱生話最有印象係喺澳洲都有舞獅，但舞獅嘅人卻係外籍年輕人佔多數，中國人反而唔係太多。睇來，我哋傳統嘅中國文化已被外國人廣泛接受，中外一家親，齊齊過熱鬧新年。
尋日係農曆正月十一日，除咗上市公司商會之外，好多團體都搞春茗，證明咗尋日應該係好日，多位嘉賓要走幾場，但都無損眾人心情，事關喺春節前後，港股幾生性，尋日又升咗四百點，個個笑到見牙不見眼。
余絲韻